O‘zbekistonda mijozlarga xizmat ko‘rsatayotgan soxta bank aniqlandi
Ijtimoiy tarmoqlarda O‘zbekiston Respublikasi Markaziy banki nomidan tayyorlangan soxta litsenziya tarqatilgani aniqlandi. Hujjatda tilga olingan “Oltin Oy Kredit” aksiyadorlik-tijorat banki amalda mavjud emas.
Markaziy bank ushbu nomdagi bankka hech qachon litsenziya berilmaganini ma’lum qildi. Shu sababli mazkur tashkilot nomidan ko‘rsatilayotgan bank xizmatlari noqonuniy hisoblanadi.
Regulyator fuqarolarni moliyaviy xizmatlardan foydalanishdan oldin bank yoki kredit tashkilotining litsenziyasini Markaziy bankning rasmiy ro‘yxati orqali tekshirishga chaqirdi. Bu firibgarlik holatlarining oldini olish va shaxsiy mablag‘larni himoya qilishga yordam beradi.
